Maxkamadda Sare ee Sishilis (Seychelles) ayaa sii daaysay Shan dhallinyaro Soomaali ah, kadib markii lagu waayay wax danbi ah oo muujinaya inay Burcad-baddeed yihiin.
War ay baahisay Wakaalladda Wararka Seychelles News Agency, ayaa lagu muujiyey in Xeer-beegtida Maxkamadda Sare ay sheegeen in markii Dhallinyarada Soomaalida laga soo qabanayay Badda aanan lagu helin iyagoo faraha kula jira wax sharci-darro ah, isla markaana aysan wadanin wax Hub ah.
Shantan Dhallinyarada ah ayaa la sii daayay, isla markii ay Maxkamadda Sare ee Sisihilis maalintii shalay ay ku dhawaaqday inaysan wax Dembi ah gelin, waxa lagu soo edeeyayna aanay waxba ka jirin.
Qareenada difaacaysay dhallinyaradan ayaa la bedelay Sedex jeer, taasi oo keentay dib u dhaca Dhegeysiga Dacwadii loo haystay.
Xafiiska Qaramaa Midoobay ugu qaabilsan Ka hortaga Daroogada iyo Dembiyada ee loo soo gaabiyo UNODC ayaa waxay haatan isku duwayaan dhamaan Dukumentiyada lama huraanka ah si Dhallinyaradaasi dib loogu soo celiyo dalkooda Hooyo.
