Wiilashaan oo naafo ka ah Aragga oo deeq waxbarasho ka helay mid ka mid ah iskuulada waxbarasho ee loogu talagalay dadka Aragga la’a ee ku yaala magaalada Durban ee dalka Koonfur Africa ayaa Xalay saqdii dhaxe waxaa ay soo gaareen magaalada Johannesburg.
Qaar ka mid ah dhallinyarada Soomaalida ee ku nool magaalada Johannesburg, madaxda Jaaliyadda iyo waliba Mas’uuliyiin ka socday safaaradda Soomaaliya ay ku leedahay dalka Koonfur Afrika ayaa garoonka diyaaradaha ee magaalada Johannesburg kusoo dhaweeyay dhallinyaradaani.
Abiikar Xuseen Bashiir oo ka mid ah maamulka iskuulka dadka aragga la’a ee Al Basiir oo ku yaala magaalada Muqdisho ee caasimada dalka Soomaaliya oo Warbaahinta Qaranka kula hadlay gudaha garoonka diyaaradaha ayaa sheegay in dhallinyaradaan ay fursado waxbarasho ay ka haleen dugsiga Al-Nuur ee ku yaala magaalada Durban gacan ay ka siisay Wasaaradda Waxbarashada Soomaaliya.
Maxamed Cabdulaahi Axmed, Maxamed Muktaar iyo Cabaas Maxamed oo ah dhallinyarada fursadaan waxbarasho ka helay dalkaan Koonfur Afrika oo Warbaahinta Qaranka ay dareenkooda wax ka weydiisay ayaa sheegay in ay aad ugu faraxsan yihiin, isla markaana ay rajeynayaan in heer ay ka gaaraan waxbarashada si bulshada la mid ah ay wax ugu qabtaan.
Waa ardaydii ugu horeysay ee deeq waxbarasho ku tega dalka Koonfur Afrika, waxaana la filayaa in ay yimaadaan bilaha soo socda arday kale oo heer Jamacadeed oo deeq waxbarasho ku helay sida uu Warbaahinta Qaranka u sheegay Cabdi Xalane Xirsi u qaabilsanaha safaaradda dhanka Waxbarashada.
Ardaydaan waxaa ay Waxbarashada Dugsiga Dhaxe ku soo qaateen gudaha dalka Soomaaliya, waxaana hadda halkaan uga bilaabanaya Waxbarashada Dugsiga Sare, ayaga oo rajeynaya in ilaa heer Jamaacadeed ay ka gaaraan ay ku dhameysan doonaan gudaha dalka Koonfur Arika.
Cabdullahi Maxamuud Amiin.
Cabdullaahi Qorshe
Johannesburg South Africa.
