Guddoomiyaha Hay’adda Maareynta Musiibooyinka Qaranka Soomaaliyeed (SoDMA), Mudane Maxamuud Macalin Cabdulle, ayaa maanta booqday Isbitaalka Hooyada iyo Dhallaanka Banaadir ee magaalada Muqdisho, si uu ugu kuurgalo xaaladda ka dhalatay abaaraha iyo nafaqo-darrada dalka.
Guddoomiyaha waxuu warbixin ka dhageystay Agaasimaha Isbitaalka, Mudane Cabdirisaaq Shariif Cali, oo ka hadlay culeyska ka jira adeegyada caafimaad iyo nafaqo-darrada. Wuxuu xusay in inta badan bukaannada ay saameyn ku yeesheen kadib markii ay xirmeen ku dhawaad 700 xarumo caafimaad ah oo horey u bixin jiray adeegyada hooyada iyo dhallaanka oo kuyaalay Gobalada dalka, taas oo la xiriirta hoos u dhaca deeqihii beesha caalamka.
Intii uu kormeerka ku jiray, Guddoomiyuhu wuxuu indhihiisa ku arkay xaalado nafaqo-darro iyo baahi caafimaad oo sii kordheysa. Wuxuu caddeeyay in Hay’adda SoDMA ay garab istaagi doonto isbitaalka, isla markaana ay bixin doonto taageero isugu jirta raashin iyo cuntooyin nafaqo leh si wax looga qabto baahiyaha taagan.
Ugu dambeyn, Guddoomiyaha Hay’adda SoDMA, Mudane Maxamuud Macalin Cabdulle, ayaa ugu baaqay ganacsatada iyo guud ahaan shacabka Soomaaliyeed inay garab istaagaan Isbitaalka Hooyada iyo Dhallaanka Banaadir, si loo badbaadiyo nolosha dadka la ildaran nafaqo-darrada.
