Agaasimaha Waaxda tababarrada iyo xirfadaha Wasaaradda Dhallinyarada iyo Isboortiga Soomaaliya Ramlo Cismaan Shariif ayaa tababar la xiriira farsamada gacanta iyo xirfadaha gaagaaban ee shaqada xafiiska, Multimedia Skills iyo qurxinta gabdhaha usoo xirtay 77 dhallinyaro ah oo wiilal iyo gabdho isugu jira.
Dhallinyarada oo ka kala yimid degmooyinka gobolka Banaadir ayaa lagu tababaray xarunta Dhallinyarada ee degmada Cabdicasiis, waxaana fulintiisa iska kaashaday Wasaaradda Dhallinyarada iyo cayaaraha iyo hay’adda maxalliga ah ee IRise.
Agaasimaha Waaxda tababarrada iyo xirfadaha ee Wasaaradda Ramlo Cismaan Shariif ayaa kula dardaarantay dhallinyarada ka faa’iidaystay koorsooyinkan inay buuxiyaan suuqa shaqada oo xilliyada qaar shirkaduhu dad ajinebi ah kala yimaadaan dalka dibaddiisa.
Tababarkan ayaa qayb ka ah balan qaadkii uu Wasiirka Wasaaradda Mudane Maxamed Barre Maxamuud la galay Raisul Wasaaraha Xukuumadda DAN-QARAN oo ahaa in sanadka 2023 la tababaro dhowr kun oo Dhallinyaro ah si loo sahlo inay dhakhso ku biiraan suuqa shaqada.
