Ayadoo Wasaaradda Gaashaandhigga Soomaaliya ay waddo dadaalo ku aadan horumarinta barnaamijka isku dhafka ciidanka xoogga dalka ayaa magalaada Muqdisho waxaa ka soconaya tababbar la siinayo boqolaal dhallinyaro ah oo ka kala yimid gobollada dalka, kuwaasi oo qeyb ka ah isku dhafka ciidanka xoogga dalka.
Taliska ciidanka xoogga dalka ayaa faah faahin kabixiyaay ย boqolaal askari , kuwaasi oo qeyb ka noqonaya ciidamada isku dhafka ah ee xoogga dalka ee lagu tababbarayo dugsiga tababbarka ee Jeneraal Gordan ee ay maamusho dowladda Imaaraadka Carabta, waxaana goobta soo gaaray Jeneraal Ceynte madaxa Hogaanka xiriirka dibadda, Gaashaanle Sare Xasan Maxamed Nuur madaxa Hogaankaย tababbarka iyo Gaashaanle sare Xasan Maxamuud Yuusuf hogaanka, abaabulka iyo qorsheynta ee ciidanka, kuwaasi oo u kuur galayay sida ay u socoto xulista dhalinta loo qaadanayo ciidamada.
Duuliye Nuur Aadan Nuur oo ah Lataliyaha Wasiirka Gaashaandhiga ahna Madax diwaan gelinta ciidamadsa isku dhafka ah ayaa ka warbixyaya tababarkani iyo qaabka uu u socdo.
“Waxaan maanta halkan u joognaa qaadashada dufcadda afaraad ee ciidanka qalabka sida kuwaasi oo lagu tababbari doono dugsiga Jeneraal Gordan ee ay maamusho Imaaraadka Carabta, waxaana lagu xulanaya sharuucda ciidanka lagu qaato”ayuu yiri Duuliye Nuur Aadan.
Madaxa Hogaanka Xiriirka Dibadda ee ciidanka Jeneraal Cabdullaahi Xaaji Maxamed Ceynta ayaa sheegay in ciidamadani ay qeyb ka yihiin isku dhafka ciidamada oo dowladda Soomaaliya ay ka caawinayso Imaaraadka Carabta.
“Waxaan halkan u nimid inaan goob joog ka ahaano ciidamada loo qorayo dugsiga Jeneraal Gordan, horey waxaa loo qoray saddex dufcadood, kuwaasi oo dhameystay tababbarka loo qabtay, dugsigan waxa uu bilow u yahay isku dhafka ciidamada xoogga dalka Soomaaliyeed” ayuu yiri Jeneraal Caynte.
Ciidamadani ayaa marka uu tababarka u dhamaado waxaa lagu wadaa in ay qeyb ka noqdaan howlgallada dalka looga sifeynayo maleeshiyaadka Al-Shabaab, ayadoo qorshaha uu yahay in isku dhafka ciidamada lagu balaariyo guud ahaan gobolada dalka.
