Guddoomiyaha degmada Boondheere ee gobolka Banaadir Saynab Yuusuf Wehliye ayaa kormeertay dhismaha wajigii sedexaad ee wadada Ganaraal daa’uud oo dib udhis balaaran uu ku socdo .
Wadada oo isku xerta isgoosyada Boondheere iyo Siinaay ayaana in ka badan 25 sano helin dayactir waxaana haatan bilaawday laamigii la saarayay oo ay iska kaashanayaan maamulka gobolka Banaadir iyo ganacsato Soomaaliyeed .
Guddoomiyaha degmada Boonddhere Saynab Yuusuf Wehliye ayaa sheegtay in wadadaan ay muhiim u tahay bulshada labada degmo ee Boondheere iyo wartabada waxaana sidoo kale ay sheegtay inay dhismahaan uu ka mid yahay dib u dhiska wadooyinka Caasimada.
“Waa qeyb ka mid ah dhismooyinka wadooyinka caasimada hase ahaatee wadadaan waa marin muhiim u ah bulshada labada degmo ee Boondheere iyo Warta-nabada waana uga mahadcelineynaa maamulka gobolka banaadir iyo intii ka qeyb-qaadatay”ayay ku dartay Guddoomiye Saynab.
Qaar ka mid ah dad deegaanka oo ay ka mid ahaayeen odoyaal iyo dhallinyaro oo aan la dhaxqaadnay Mikrafoonka Warbaahinta Qaranka ayaa ka mahadceliyay inay loo dhiso wadadaan oo marin muhiim u ah nolosha iyo hormarka bulshada ku dhaqan labada degmo.
Guddoomiyaha Degmada Boonddhere Saynab Yuusuf Wehliye ayaa sidoo kale shacabka ugu baaqday inay illaaliyaan nadaafada wadada, maadaama ay ka jawaabeen cabashada ay ka qabeen taasi oo ku aadan bur burka ka muuqday iyo in gabi ahaanba uu hakad galay isku socodka gadiidka.
Wadada janaraal Daa’uud waxa ay ka mid tahay wadooyinka ugu muhiimsan caasimada hase ahaatee qeytaan isku xerta degmooyinka Boondheere iyo Warta nabada ayaa hadii la dhameystiro waxa ay soo kordhin doontaa ganacsiga iyo inuu fududaado isku socodka gadiidka dadweynaha oo haatan uusan ka jirin waxaana bulshadu ay soo dhaweeyeen in loo dhiso.
