Bannaan bax lagaga soo horjeedo sii socoshada tahriibta bulshada Soomaaliyeed ayaa maanta ka dhacay qaybo ka mida magaalada Muqdisho.
Muddaaharaadkan oo ay qaban qaabadiisu lahayd wasaaradda dhallin-yarada iyo ciyaaraha ee xukuumadda federaalka Soomaaliya ayaa ahaa mid xambaarsan digniino ku aaddan qataraha ka iman kara socdaalka sharci darrada ah.
Dibed baxayaasha oo u badnaa da’yarta wax ka barata Jaamacadaha ku yaalla magaalada Muqdisho,ayaa ku dhawaaqayay ereyo lagu wacyi gelinayo dhallinta ku dhammaanaysa marinnada halista ah ee u dhexeeya Afrika iyo Yurub.
Wasiirka wasaaradda dhallin-yarada iyo ciyaaraha Soomaaliya Maxamed Cabdulaahi xasan (Nuux) oo goob fagaara kulahadlay Boqolal dhalinyara ayaa ugu baaqay in laga hortago Tahriibta,si wada jir ahna loogu guntado joojinta safarrada halista ah.
Wasiir Nuux ayaa da’yarta Soomaaliyeed ee isu soo baxa isugu timi ku boorriyay iney dalkooda iimaansadaan isla markaana ay la yimaaddaan fekrado laga samayn karo shaqa abuuur,isagoo ballan qaaday iney wasaaraddiisu si weyn u garab istaagi doonto.
Horaantii todobaadkan ayey ahayd markii dhallin-yaro kor u dhafaysa 400 oo qof una badan Soomaali ay ku naf-wayeen badda u dhaxeysa Masar iyo Talyaaniga,xilli ay doonayeen iney fursado shaqo ka raadsadaan waddamada reer Yurub
