Dood cilmiyeedkan oo ay soo qaban qaabiyeen ardayda dhigata Kuliyadda dhaqaalaha iyo cilmiga bulshada ee Jaamacadda SIMAD ayaa waxaa u jeedku ahaa ilaalinta deegaanka, waxaana ka qeyb galay ardayda dhigata Jaamacadda iyo marti sharaf kale.
Intii ay socotay dood cilmiyeedka ayaa waxaa la isku dhaafsaday aaraah kala duwan, waxaana ardayda ay soo bandhigeen sida loo hagaajin karo deegaanka, iyagoo bulshada inteeda kale ka codsady inay ilaaliyaan bilicda deegaanka oo ay ka hortagaan cidkasta oo ku howlan jaridda dhirta, si aysan u dhicin nabaad guur
Cumar Colaad oo ah barre wax ka dhiga Jaamacadda SIMAD, kuna xeel dheer cilmiga ilaalinta deegaanka ayaa tilmaamay in bulshada Soomaaliyeed looga fadhiyo inay ka qeyb qaataan hagaajinta deegaanka, isagoo ardayda ugu baaqay in shacabka fahamsiiyaan sida loo ilaalin karo deegaanka.
Qaar ka mid ah ardaydii ka qeyb galay dood cilmiyeedka kana mid ahaa kuwii soo qaban qaabiyay ayaa Warbaahinta Qaranka u sheegay in u jeedka ay ka lahaayeen dood cilmiyeedkan ay tahay sidii bulshada loo fahamsiin lahaa ilaalinta deegaanka.
Gabo gabadii dood cilmiyeedka ayaa ardayda waxa ay gudaha Jaamacadda SIMAD ku beereen geed mirood.
