Inkabadan boqol ruux oo tahriibayaal ah ayaa lagu la’ yahay badda Medetereraneanka kadib markii doon ay saarnaayeen ay kua dagtay meel ka fog xeebaha dalka Libya.
Doontan oo ay saarnaayeen dad gaaray 600 oo ruux ayaa waxaa laga soo badbaadiyay 400 oo ka mid ah dadkaas halka la helay maydadka 25 ruux.
Illaa saddex markab ayaa baadigoob ugu jira doontan iyo dadkii la socday halkii ay ku dambeeyeen. Doontan ayaa la sheegay in ay baddu ku kacday xalay iyadoo maraysa meel u jirta 25km xeebta dalka Libya.
Qul-qulka Muhaajiriinta iyo dhimashada ay wajahayaan ayaa si weynsasnadkan kor ugu kacdey, waxaana qayb ka ah mushkiladda ka taagan dalka Libiya.
Inka badan 2000 muhaajiriin u badan Afrikaan ayaa sanadkan oo keliya ku dhintey xeebaha Libya iyo Talyaaniga u dhaxeeya iyagoo isku dayaya in ay u gudbaan qaaradda Yurub si ay nolol cusub uga sameystaan.
Sanadkasta boqolaal qof ayaa ku dhinta badda u dhexeysa Waqooyiga Afrika iyo Koonfurta Yurub, Soomaali badan ayaa naftooda ku biimeeya baddaas si ay u gaaraan Koonfurta Yurub.
Lama oga in dadkan la la’ yahay iyo kuwa la badbaadiyay ay ku jiraan muwaadiniin Soomaali ah, waxana ay ku soo beegmaysaa shilkan ugu dambeeyay ee ka dhacay xeebaha dalka Libya iyadoo boqolaal dhalinyaro Soomaali ah ay ku sii qulqulayaan dalka Libya si ay ugaga sii gudbaan dalka Talyaaniga.
