Magaalada Garoowe ee xarunta Dowlad goboleedka Puntland ayaa saaka ka bilaabaneysa doorashada aqalka hoose, iyadoo ergooyinka dooran lahaa 12 mudane ay iminka ku suganyihiin magaalada Garoowe ee xarunta Gobolka Nugaal.
Wariyaha Warbaahinta Qaranka Yuusuf Maxamed Maxamuud ayaa ku soo waramaya in amniga magaalada si aad ah loo adkeeyay, iyadoo ergooyinkuna ay ku sii qul qulayaan hoolka ay doorashada ka dhaceyso.
Guddiga Federaalka ee hirgelinta doorashooyinka dadban iyo kuwa heer goboleed ee Puntland ayaa ku sugan hoolka ay doorashada ka dhaceyso, waxaana doorashada ay ku saabsantahay tan aqalka hoose oo la dooran doono 12 mudane, halka inta dhiman ay maalmaha soo socda ka dhici doonto Garoowe.
Dhanka kale ciidamada amniga ayaa wada howlgallo ay ku xaqiijinayaan sugidda amniga goobaha doorashooyinka, maadaama xalay kooxo hubeysan ay weerar ku qaadeen Hotel ay deganaayeen ergooyinka dooranaya aqalka hoose, inkasta oo aysan jirin cid wax ku noqotay.
