Dowladda Faransiiska ayaa shaacisay in xaalad deg deg ah la geliyay dalka kadib markii in ka badan 120 qof lagu dilay weeraro kala duwan oo ka dhacay caasimadda Faransiiska ee Paris.
Sideed qof oo hubeysan ayaa xoog ku galay goob lagu caweeyo oo lagu magacaabo Bataclan, halkaasi oo ay ku dileen tir dad ah, iyagoo lahaysta ahaan u qabsaday toboneeyo, waxaana markii dambe ciidanka Faransiiska ay ku guuleysteen inay toogteen dadkii goobta qabsaday.
Meelaha weerarada lagu qaaday waxaa ka mid ah Garoon kubadda cagta ah lagu cayaaro iyo goobo kale oo lagu caweeyo.
Siddeed weerar oo ka dhacay magaalada Paris ayaa lagu dilay dad lagu qiyaasay 120 qof, waxaana booliska ay aaminsanyihiin in weerarka ka dhacay Paris ee xarunta dalka Faransiiska uu yahay mid argagixiso ah.
Dowladda waxa ay ku dhawaaqday xaalad deg deg ah, iyadoo dadka ku dhaqan magaalada Paris lagu amray inaysan guryahooda ka soo bixin, waxaana 1,500 Milateri lagu soo daadiyay gudaha magaalada si loo xoojiyo amniga caasimadda.
