Hey’ada ACT oo laga lee yahay Dalka Indensia ayaa maanta 40 Konteenar oo raashin ah ku Wareejisay Wasiirka Wasaaradda Gargaarka iyo Maareenta Musiibooyinka ee Xukuumada Soomaaliya Drs Maryan Qaasim Axmed, deeqdaasi oo loogu tala galay in la gaarsiiyo dadka danta yar ee ku nool Gobollada Dalka ee ay saameeyeen abaaraha ka jiray dalka.
Guddiga abaaraha Qaranka, Mamaulka Gobolka Banaadir, qaar ka mid ah Gudoomiyaasha Degmooyinka Gobolka iyo mas’uuliyin kale ayaa goob joog ka ahaa deeqdan ay Wasaaradda Gargaarka Soomaaliya lagu wareejiyay.
Madaxa Hey’adda ACT Mr. Ahyudiin ayaa Warbaahinta u sheegay in Dowlada Indonesia ay diyaar u tahay gargaar intaan ka badan inay soo gaar siiso Soomaaliya.
Guddoomiyaha Hey’adda Culumada Soomaaliyed Sheekh Bashiir Axmed Salaad oo Xubin ka ah Guddiga Gurmadka abaaraha Qaranka ayaa ka mahad celiyay deeqdan.
Guddoomiye Kuxigeenka Maamulka Gobolka Banaadir ee dhinaca Siyaasadda iyo Amniga Saalax Sheekh Maxamed oo goobta ka hadlay waxa uu tilmaamay in waqti loo baahnay ay kusoo aaday kaalmadan.
Wasiirka Wasaaradda Gargaarka iyo Maareenta Musiibooyinka ee Xukuumadda Soomaaliya Drs Maryan Qaasim Axmed oo la wareegtay Deeqdan raashinka ah ayaa waxa ay Dowladda Indonesia uga mahadcelisay sida ay garab taagan tahay shacabka Soomaaliyeed.
