Dowladda Ruushka ayaa ka dalbatay Mareykanka iney la wadaagto xogta kooxda ISIS ee ka dagaalanta waddamada Siiriya iyo Ciraaq.
Wasiir ku xigeenka Wasaarada Gaashaandhigga ee Ruushka Anatoli Antonov oo shir jaraa’iid ku qabtay Moscow ayaa sheegay in Ruushka uu ugu baaqayo Maraykanka inay wadatashi yeeshaan isla markaana is dhaafsadaan xogta goobaha duqeynta lala beegsanayo ee dalka Siiriya.
“Duqeynteena waa mid looga soo horjeedo argagaxisada, waxaan diyaar u nahay in dalalka kale aan ka wadahadalno ama aan isla dejino goobaha duqeynta si aan khalad u dhalan, marka waan ku casumayaa inay noo yimaadaan oo aan wadatashano….” ayuu yiri Wasiir kuxigeenka Difaaca Ruushka oo saraakiisha Maraykanka ku casumay inay yimaadaan Moscow
Hadalkan ka soo yeeray dowladda Ruushka ayaa imaanaya xilli Maraykanka iyo xulafadiisu ay hore ugu eedeeyeen Ruushka inuu duqeyntiisa la eegto goobaha ay ku suganyihiin mucaaradka xukuumadda Siiriya.
