Dowladda Tuunisiya ayaa wadda qorshe ay derbi uga dhiseyso xadka ay la wadaagto dalka Liibiya iyadoo sheegtay in ay dhimaystirtay qeybtii ugu horraysay ee ah 200km oo ay ku oodayso xadka ay la wadaagto Liibiya.
Darbigan oo laga sameeyay jawaanno carra ah iyo kanaal biya mareen ah ayaa waxaa loogu talagalay in looga hortago argagixisada uga talaabeysa dalka Liibiya.
Tallaabadan ay dowladda Tuniisiya ku dhiseyso derbigaasi ayaa timid kaddib markii rag hubeysan oo la sheegay in ay ku soo tababarteen Liibiya ay 38 qof ku dileen gudaha dalkaasi.
Wasiirka Gaashaandhiga ee Tuuniisiya, ayaa sheegay in wajiga labaad ee mashruuca uu ka mid noqon doono in la dhiso qalab milateri iyadoo gacan laga helayo Jarmalka iyo Mareykanka.
Ciidammada ammaanka ayaa sheegay in derbiga oo loogu talagalay in gawaarida aanay xadka ka soo tallaabin uuba mar hore gacan ka gaystay in la yareeyo howlaha tahriibinta.
In ka badan 3,000 oo Tuuniisiyiin ah ayaa waxa ay isaga tageen dalkaasi ay uga garab dagaalamaan kooxda isugu yeerta Dowladda Islaamiga ah iyo maleeshiyaad kale oo ka jira Suuriya iyo Ciraaq.
