Dugsiga Farsamada ee Maxamuud Axmed Cali oo ay dib u dhis ku sameysay Hay”adda CISP oo kaashaneysa Midowga Yurub ayaa loogu talo galay in qeybaha kala duwan ee Farsamada gacanta lagu baro dhalinyarada Soomaaliyeed, waxaana dugsigaan oo ku yaala degmada Kaaraan maanta xarigga ka jaray masuuliyiin ay kamid ahaayeen wasiir kuxigeenka wasaaradda waxbarashada iyo guddoomiye ku xigeenka Arrimaha Bulshada ee maamulka gobolka Banaadir.
Basmo Caamir, guddoomiye ku xigeenka Arrimaha Bulshada ee maamulka gobolka Banaadir oo kahadashay munaasabad lagu qabtay dugsiga oo ay goob joog ahaayeen maamulka iyo qeybaha kala duwan ee Bulshada degmada Kaaraan ayaa ugu horeyn u mahad celisay Hay’adda CISP oo dhistay dugsiga iyada oo ku bogaadisay shacabka iney ka faaiideystaan fursadan.
“Waan u mahad celinayaa Hay’adda dhistay Dugsigaan oo leh waxtar weyn, waxaan leeyahay shacabka ree Kaaraan waa iney ka faaiideystaan fursadaan ay heleen”. ayey tiri Basmo Caamir.
Wasiir kuxigeenka wasaaradda Waxbarashada Soomaaliya Faysal Cumar Guuleed ayaa tilmaamay in wasaaraddu ay gacan ka geysan doonta dhameystirka qeybaha wali u horsan dugsiga si ay uga faaiideystaan Bulshada Soomaaliyeed.
“Inta wali inoo harsan wan dhameytiri doonaa insha allah, waxaana rajeyneynaa iney halkaan kasoo baxaan farsamo yaqaano dalkaan wax kusoo kordhiya”. ayuu yiri wasiir ku xigeenka.
Dugsiga Maxamuud Axmed Cali oo bur bursanaa wixii ka dambeeyey markii ay dhacday dowladii dhexe ee dalka ayaa dib u dhiskiisa waxa uu fursad u yahay dhalinyaro badan oo Soomaaliyeed oo doonayey iney bartaan xirfado ay ku shaqeystaan.
