Guddoomiyaha Gobolka Banaadir ahna Duqa Magaalada Muqdisho Mudane Yuusuf Xuseen Jimcaale (Madaale) oo ay wehliyaan Xildhibaanno ka tirsan BFS ayaa deeq Raashiin oo ka timid Maamulada Degmooyinka Kaxda iyo Boondheere ku wareejiyay Haweenka Hormuudka u ah Ollolaha Hooyo u Hiili Qaranka ee lagu garab istaagayo Ciidanka Qaranka Soomaaliya.
Duqa Muqdisho ayaa sheegay in Deeq-daan ay qeyb ka tahay qorshaha Maamulada Degmaaoyinka Gobolka Banaadir iyo Bulshada Caasimadda ay kaga qeyb qaadanayaan garab istaagga Ciidanka Qaranka “Ollolaha Hooyo u Hiili Qaranka” ee sahayda qalalan lagu gaarsiinayo Ciidamada ku howlan dagaalka sifeynta kooxaha Khawaarijta.
Guddoomiye Ku-xigeenka Amniga iyo Siyaasadda Gobolka Banaadir Mudane Maxamed Axmed Diiriye (Yabooh), Xoghayaha Guud ee Maamulka Gobolka Banaadir Mudane Feysal Caraale Afrax iyo qaar ka mid ah Guddoomiyeyaasha Degmooyinka G/Banaadir ayaa goobjoog ka ahaa munaasabadda uu Duqa Muqdisho ku wareejinayay Deeqda.
