Duqa Muqdisho ahna Guddoomiyaha Gobolka Banaadir Mudane Cabdiraxmaan Cumar Cusmaan (Eng. Yarisow) ayaa ugu baaqay shacabka ku nool Magaalada Muqdisho in ay ka qeyb-qaataan dib-u-dhiska iyo bilicda dalkooda, si looga maarmo gacmo shisheeye, dibna loogu soo celiyo bilicdii ay caanka ku ahayd Muqdisho.
Guddoomiyaha oo ka qeyb-galay Olole Nadaafadeed laga sameeyey Degmooyin kamid ah Muqdisho ayaa tilmaamay in meel wanaagsan uu marayo barnaamijka Isxilqaan ee horey ugu dhawaaqay Madaxweynaha Jahmhuuriyadda, isla markaana laga nadiifiyey geedihii iyo qashinkii yaalay Garoonka Cayaaraha ee Muqdisho.
Sidoo kale Guddoomiye Eng. Yarisow ayaa faray maamullada Degmooyinka iyagoo kaashanaya shacabka in ay dardargeliyaan barnaamijkan, si loo soo celiyo quruxda iyo bilicda ay ku tilmaamnayd caasimaddu.
“Ololahan Nadaafadeed waxuu qeyb ka yahay barnaamijka Isxilqaan ee lagu dhiirigelinayo howlaha bilicda, faya-dhowrka iyo dib-u-dhiska goobaha muhiimka ah, waana barnaamij ujeedkiisu yahay gacantaada ku dhiso dalkaaga ee uu horey Madaxweynaha Jamhuuriyaddu ugu dhawaaqay.”
Duqa Muqdisho ayaa kula dardaarmay Isxilqaamayaasha maanta qeybta ka ahaa Ololahan Isxilqaan in ay hormuud ka noqdaan ka qeyb qaadashada barnaamijyada dib loogu dhisayo dalka, isagoona tilmaamay in ay waajib ku tahay in ay tusaale wanaagsan u noqdaan shacabka Soomaaliyeed si ay dalkooda u dhistaan.
Dhanka kale, Guddoomiyaha Gobolka Banaadir ayaa kormeer ku tagey qaar kamid ah Ganacsiyada ku yaalla hareeraha waddooyinka, isagoo ku dhiirigeliyey dadaalkooda ku aaddan dib-u-dhiska dalka iyo u adeeggidda Shacabka Soomaaliyeed
–DHAMMAAD–
