RADIO MUQDISHO:-Guddoomiyaha Maamulka Gobolka Banaadir ahna Duqa Magaalada Muqdisho Dr. Xasan Maxamed Xuseen (Muungaab) ayaa maanta kormeer shaqo ku tagay Xarunta Agaasinka Waxbarashada Gobolka Banaadir, kadib markii dib-u-dhis ballaaran lagu sameeyay, asigoo warbixin ka dhageystay howlwadeennada kala geddisan ee Agaasinka Waxbarashada Gobolka Banaadir.
Duqa Muqdisho ayaa uga mahadceliyay Agaasinka Waxbarashada Gobolka Banaadir shaqada wanaagsan ee ay u hayaan bulshada, wuxuuna hoosta ka xarriiqay in Maamulka Gobolka Banaadir ay muhiimad gaar ah u leedahay horumarinta adeegga waxbarashada, si waalidiinta canshuur-bixiyeyaasha ah ay ubadkooda ugu helaan waxbarasho lacag la’aan ah.
“Waxaan dhawaan saxiixay lacag ku dhow saddex boqol kun oo doolar, oo loogu talagalay horumarinta dugsiyada waxbarashada Gobolka Banaadir sanad dugsiyeedkiiba, taas oo aan sii kordhin doonno, iyadoo ay barbar soconayaan qorshayaal dhowaan lagu dhisi doono dugsiyo waaweyn,” ayuu yiri Duqa Caasimadda Muqdisho, oo waalidiinta ugu baaqay in ubadka loo diro dugsiyada waxbarashada si loola dagaallamo jahligga.
Guddoomiyaha Maamulka Gobolka Banaadir ahna Duqa Magaalada Muqdisho Dr. Xasan Maxamed Xuseen (Muungaab) ayaa sheegay in la fududeeyay helitaanka shahaadada dugsiga dhexe oo markii hore culeysyo ay ka taagnaayeen, asigoo kula dar-daarmay bahda waxbarashada in si hufan oo caddaalad ah loo qaado imtixaannada sanad dugsiyeedka ee nagu soo fool leh.
