Guddoomiyaha Gobolka Banaadir Ahna Duqa Magaalada Muqdisho Yuusuf Xuseen Jimcaale (Madaale) ayaa Garoonka Diyaaradaha Aadan Cadde ee Magaalada Muqdisho u tagay sidii uu halkaasi ugu soo dhaweyn lahaa isla markaana xanuunka uu ula qeybsan lahaa dhaawacyada dadkii kusoo waxyeeloobay Qaraxyadii maanta ka dhacay Magaalada Beledweyne ee xarunta Gobolka Hiiraan, kuwaasi oo lasoo gaarsiiyay Magaalada Muqdisho si loola tacaalo xaaladooda caafimaad.
Guddoomiye Yuusuf Xuseen Jimcaale Madaale ayaa si kulul u cambaareeyay Weerarkii Qaraxyada ahaa ee maanta ka dhacay Beledweyne “Falalka bahalnimada ah oo ay geysanayaan kooxaha Argagisada ma noqon doonno mid niyad jabiya Kacdoonka Shacab iyo midka Ciidankeena geesiyaasha ah ee dagaalka kula jira kooxaha Argagixisada, Reer Hiiraan waxaa aynu la qeybsaneenaa dhibta iyo xanuunka, waxaan leenahay Allaha ha idin la jiro, anagana mar weliba waxaan nahay garabkiina”. Ayuu yiri Duqa Muqdisho oo dhaawacyadii laga keenay Beledweyne geeyay xarumaha Caafimaadka.
Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale) ayaa tacsi u diray qoysaska iyo ehellada dadkii naftooda ku waayay weerarkii maanta ka dhacay Beledweyne, waxuuna Allaha uga baryey caafimaad deg-deg ah in uu siiyo dadkii ku dhaawacmay Qaraxyadaasi.
Ugu danbeyn waxa uu shacabka Soomaaliyeed meelkasta oo ay joogaan ugu baaqay in loo midoobo dagaalka ka dhanka ah Kooxaha Argagixisada, isla markaana Ciidanka Qaranka lagu garabsiiyo sidii guud ahaan dalka loogu xoreyn lahaa Kooxaha ciribtiraayo kooxaha xagjirka ee banneystay nafta, maalka iyo sharafka ummadda Soomaaliyeed.
