Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale),ayaa Tababar usoo xiray 150 dhallinyaro ah oo muddo bil ah Aqoon kororsi ku saabsan Culuumta Saxaafadda, Computerka, Culuumta Bulshada iyo Caafimaadka ugu socday xarunta dhexe ee Dhallinyarada Gobolka Banaadir.
Sidoo kale Guddoomiyaha Gobolka Banaadir Ahna Duqa Magaalada Muqdisho Mudane Yuusuf Xuseen Jimcaale (Madaale), ayaa isla xarunta dhexe ee Dhallinyarada Gobolka Banaadir Tababar ku aadan Qiimeynta, Daba-galka iyo Qawaaniinta Sharciga ugu furay boqolaal ka tirsan Dhallinyarada Gobolka Banaadir.
Munaasabada, ayaa waxaa goobjoog ka ahaa Guddoomiye Kuxigeenka Amniga iyo Siyaasadda Maamulka Gobolka Banaadir Mudane Maxamed Axmed Diiriye (Yabooh), Kuxigeenkii hore ee Amniga iyo Siyaasadda Cali Cabdi Wardheere (Cali Yare), Guddoomiyaha Dhalinyarada Gobolka Banaadir Cabdikaafi Maxamuud Makaraan iyo La-taliyaha dhinaca Sharciga ee Maamulka Gobolka Banaadir Avv. Maxamuud Cabdinuur (Abukaato Kitaabi).
Khudbad dheer oo dhinacyo badan taabaneysa oo uu Guddoomiyaha Gobolka Banaadir halkaasi ka jeediyay,ayaa waxaa uu ku dheeraaday doorka Dhallinyarada ee ku dhax leeyihiin Bulshada Soomaaliyeed iyo sida Maamulka Gobolka Banaadir ugu go’an tahay Awood-siinta Dhallinyarada, Kobcinta Aqoonta iyo sidii loogu heli lahaa shaqo abuur maadaama ay yihiin tirada ugu badan ee Bulshada.
Guddoomiyaha Gobolka Banaadir ayaa kula dar-daarmay Dhalinyarada Gobolka Banaadir in laga faa’ideysto duruusta ay bixinayaan Aqoon-yahanada si ay u kobciyaan Maskaxdooda, iyadoo laga fogaanayo Maandooriyaha, isla markaana laga qeyb-qaadanayo sugida Amniga, Dagaalka ka dhanka ah Khawaarijta iyo garab istaaga dowladnimadda Soomaaliya. Iyadoona halkaasi Shahaadooyin lagu guddoonsiiyay Dhalinyaradii Tababarka usoo xirmay.
Ugu dambeyn Guddoomiyaha Gobolka Banaadir Ahna Duqa Magaalada Muqdisho iyo Ku-xigeenkiisa Amniga iyo Siyaasadda ayaa shir gaar ah la qaatay Guddoomiyeyaasha Dhalinyarada Degmooyinka iyo Deegaanada Gobolka Banaadir, si uu mid mid warbixin ku aadan howlahooda shaqo iyo caqabadaha jira ugu dhageysto. Waxa uuna kula dar-daarmay in la dar-dar geliyo Howlaha shaqo ee Bulshada loo haayo.
