Gudoomiyaha gobolka Banaadir ahna Duqa Muqdisho Cabdiraxmaan Cumar Cismaan (Eng. Yarisow) ayaa tartan Isborti oo ku saabsan isdhexgalka bulshada ka furay degmada Heliwaa ee gobolkan Banaadir, isagoo ugu baaqay dhalinyarada in ay ka qeyb qaataan nabadda iyo horumarka.
Duqa Muqdisho ayaa xusay in kulamada noocaan ah ee lagu abaabulo dhallinyarada ay horumarinayaan nabadda iyo isdhexgalka bulshada, Waxuna ku ammaanay maamulka degmada Heliwaa abaabulka tartanka.
Eng. Yariisow ayaa yiri “Waxaan ugu baaqayaa dhalinyarada ku nool Caasimadda in horumarka dalkooda ay u istaagaan, mar walba in aan ku dhiirigelino dhalinyarada nabadda iyo isdhexgalka waxaa ay ka mid tahay dadaalkeenna joogtada ah ee aan ku dooneyno in aan ku horumarina kuna xoojinno xiriirka aan la leennahay bulshadeena, si aan u xaqiijinno horumarkooda. Cayaarta kubadda cagtuna waxaa suurta gelisay nabadda aan haysano, taasoo u sahashay dadweynaha in ay ka qayb-galaan arrimaha bulshada,”
Dhinaca kale duqa Muqdisho ayaa kormeeray xarunta degmada Heliwaa, isagoo ku ammaanay maamulka iyo shacabka wada shaqeynta iyo iskaashiga ay leeyihiin wuxuuna ugu baaqay in ay sii xoojinayaan loona istaago dib-u-dhiska degmada.
