Guddoomiyaha Gobolka Banaadir ahna Duqa magaalada Muqdisho Mudane Cumar Maxamuud Maxamed (Cumar Filish) ayaa maanta xarigga ka jaray dhismaha lagu sameeyay waddada Laamiga ee hormarta Warshada Caanaha ee Degmada Hodan.
Waddadaan oo aheyd mid bur-bur ku yimid isla markaana dhibaato xoogan oo dhanka isku socodka ah ay ku qabeen shacabka ayaa muddo kooban lagu dhisay, iyadoo laga jawaabayo cabashada Shacabka.
Duqa Muqdisho ayaa kula dardaarmay Bulshada in ay ka shaqeeyaan sidii ay u ilaashan lahaayeen Dhismaha lagu sameeyay Waddadaan Laamiga ah, isla markaana ay ugu shaqeyn lahaayeen Bilicda iyo Nadaafada.
Maamulka Gobolka Banaadir ee uu Hogaamiyo Guddoomiye Cumar Maxamuud Maxamed (Cumar Filish) ayaa horey u fuliyay Mashaariicyo badan oo dib u dhis loogu sameenayo wadooyinka Laamiga ah ee magaalada Muqdisho, si ay shacabka ugu fududaato isu socodka, isla markaana kaabayaasha dhaqaalaha uu dib usoo laabto.
Qorshahaan ayaa qeyb ka ah Horumarinta iyo dib-u-dhiska Caasimadda Muqdisho.
