Allaha u naxriistee duqii degmada Afgooye Cali Cabdow (Cali Jamiin) ayaa maanta geeriyoday kadib markii kooxda Al-shabaab ay Miino u aaseen gaari uu la socoday.
Guddoomiyaha gobolka Shabeelaha Hoose Cabdulqaadi Maxamed Nuur Siidii ayaa warbaahinta u sheegay in Allaha u naxriistee Cali Jamiin uu howlo shaqo u joogay magaalada Muqdisho isla markaana dhagar qabayaal ka tirsan kooxda Al-shabaab ay ku dileen deegaanka Xaawo Cabdi ee duleedka magaalada Muqdisho xilli uu ku sii jeeday degmada Afgooye.
Guddoomiye Sidii ayaa sidoo kale sheegay in gaariga ay saarnaayeen 5 ruux 2 kamid ah oo uu ku jiro duqii degmada Afgooye ay geeriyoodeen halka 3 kale ay dhaawacmeen, isagoo tilmaamay in ay wadaan baaritaano ku aadan sida falka uu u dhacay.
