Duufaan xoog leh oo loogu yeeray magaca “Matthew” oo xowligeeda lagu qiyaasay in ay ku socoto 220 kilomitir saacaddiiba ayaa ku fool leh dalalka Jamaica iyo Haiti.
Shacabka ku nool labadaasi dal ayeey arrintani walwal baahsan ku abuurtay maadaama qubarada saadaasha hawadu ay sheegeen in duufaantani sababi karto daadad, dabeylo xooggan wata, dhimasho iyo bur-bur hantiyeed.
Hadda waxa ay duufaantani soo mareysaa meel 325 kilomitir galbeedka kaga aadan caasimadda dalka Haiti ee Port-au-Prince, waxaana ay shacabku mar horeba dareemayaan culeyska duufaantani.
Ma ahan markii ugu horreysay oo labadani dal ku dhuftaan duufaano xooggan, laakiin waa markii ugu horreysay oo duufaan xooggeedu la mid yahay tan iminka soo socota ku dhifato mudo 10 sanadood ah.
