Munaasabad kooban oo ka dhacday gudaha Garoonka Caalamiga ah ee Jooma Kenyatta ayaa waxaa ka qeyb galay Safiirka Jamhuuriyadda Federaalka Soomaaliya u fadhiya Dalkaan Kenya Danjire Jabriil Ibraahim Cabdulle, Wasiirka Wasaaradda Difaaca Dowladda Kenya Mudane Aadan Barre Ducaale, Wasiirka Duulista Hawada Dowladda Kenya iyo xubno kale.
Waxaa xafladda ka hadlay Wasiirrada duulista hawada iyo Difaaca ee Dowladda Kenya, kuwaasi oo xusay inay tahay talaabo horumar leh oo sii xoojineysa xiriirka labada dal.
Ugu dambeyn ayaa Safiirka Soomaaliya ee dalka Kenya Danjire Jabriil Ibraahim Cabdulle waxa uu Warbaahinta Qaranka uga warbixiyay muhiimada ay u leedahay in Shirkadda Diyaaradaha Kenya Airways maanta markale dib u bilowdo Dulimaad toos ah ay ku tageyso Muqdisho iyo Nairobi, isagoo intaa raaciyay in Shacabka Soomaaliyeed ay faa’iido u leedahay ee u kala safra Soomaaliya iyo Dalka Kenya.
Tani waa talaabo wanaagsan oo qeyb weyn ka qaadan karto hurumarka iyo isku socodka dadka iyo badeecadaha dalka, maadaama Dowladda Somaaliya dhawaan ku biirtay Ururka Goboleedka Iskaashiga Dhaqaalaha Bariga Afrika.
