Warar dheeraad ah ayaa ka soo baxaya qaraxii galabta ka dhacay bar kontorool oo dhinaca ku heysa golihii Murtida iyo Madadaalada ee Tiyaatarka.
Shan qofood ayaa geeriyootay qaraxaasi 15 kalena wey ku dhaawacmeen, iyadoo gaariga qarxay noociisu ahaa Mini Bus ama Homey.
Gaarigan ayaa qarxay kaddib markii ciidamo halkaasi ilaalo ka hayay ay u diideen gaarigaasi in uu u gudbo waddada hormarta irridda weyn ee madaxtooyada oo ka soo horjeedda hoteelka SYL.
Dadka ku geeriyooday iyo kuwa ku dhaawacmay ayaa u badnaa dad rayid ah oo ka agdhawaa goobta qaraxu ka dhacay.
Gaadiidka gurmadka deg degga oo halkaasi gaaray qaraxa kaddib ayaa lagu daad gureeyay dadkii ku dhaawacmay masiibadaasi kuwaasoo lagu daweeynayo isbitaalada ku yaalla Muqdisho.
