Maxkamadda Ciidamada Qalabka Sida Qeybta Galmudug ayaa shalay galinkii danbe u fariisatay dhageysiga Dacwad loo heysto eedeeysanayaal ka tirsanaa Ciidanka Gor gor ee xoogga dalka Soomaaliyeed, kuwaas oo kala ahaa Dable xoogga Iidle Cumar Idiris kana mid ahaa guutada 18 aad ee ururka 6aad ee ciidanka Gor Gor kaas oo xafiiska xeer ilaalintu kusoo eedeeyay inuu dil bareer ah u geystay Allaha u naxariistee Marxuumad Bilan Xaashi Salaad oo uu ku dilay Dagmada Xarardheere taariiqdu markeey aheyd 29/06/2023 iyo Dable Qaasim Ciise Maxamed oo ku eedeysnaa in uu ku caawiyay dilka Bilan Xaashi Salaad oo u dhiibay Qoriga dilka lagu geystay
Gudoomiyaha Maxakamada Ciidamada Qalabka sida Qeybta Galmudug Gaashaanle dhaxe Cabdullaahi Abuukar Xasan (Cabdullaahi Dheere). ayaa ugu horeeyn u akhriyay labada eedeeysane Dacwadda uu kasoo gudbiyay xafiiska xeer ilaalinta.
Intaas kadib waxaa maxkamadda la horkeenay Marqaatiyaashii goob jooga ahaa markii uu dhacayay falka dilka ah
Kormeere koowaad Xamdi Maxamuud Maxamed oo aheyd baarihii kiiska ayaa ka warbixisay baritaankii ay sameeyeen iyo natiijadii kasoo baxday
Xeer ilaaliyaha Maxkamada Ciidamada Qalabka sida Qeybta Galmudug Gaashaanle Sare Cabdulaahi Maxamed Muuse Keyse ayaa ka codsaday Garsoorka Maxkamadda in lagu xukumo ciqaab u dhiganta Falka ay geeysteen
Qareenkii u doodayay eedeeysanayaasha ayaa isna maxkamadda ka codsaday in fursad loo siiyo eedeeysanaha koowaad oo ah Iidle Cumar Idiris in ay ka wada hadlaan eheladiisa iyo tan marxuumadda geeriyootay, isagoo dhanka kalana difaacay eedeeysanaha labaad oo ah Qaasim Ciise Maxamuud
Gudoomiyaha Maxakamada Ciidamada Qalabka sida Qeybta Galmudug Gaashaanle dhaxe Cabdullaahi Abuukar Xasan ayaa soo xiray shalay fadhigii koowaad Maxkamadda.
Dhinaca kale Maxkamadda oo maanta u fariisatay fadhigii labaad ee eedeeysanayaasha ka tirsan Ciidanka Gor Gor ee xoogga dalka ayaa ku dhawaaqday Xukunka
Gudoomiyaha Maxakamada Ciidamada Qalabka sida Qeybta Galmudug Gaashaanle dhaxe Cabdullaahi Abuukar Xasan (Cabdullaahi Dheere) ayaa ku dhawaaqay xukunka, isagoo sheegay in eedeeysanaha koowaad oo ah Dable Xoogga Iidle clCumar Idiris Barrow ay Maxkamadu ku xuntay dil toogasha ah, halka eedeeysanaha labaad ee ah Qaasim Ciise Maxamed lagu Xukumay Labo Sano oo Xabsi Ciidan ah ayna u furan tahay racfaan muddada sharcigu qabo
