Bandhigga soo nooleynta Farshaxanka, Cayaaraha iyo Dhaqanka oo maalmahan ka socday magaalada Muqdisho ayaa lagu soo gabo gabeeyay garoonka kubadda Kolleyga Wiish ee degmada C/casiis, iyadoo ay ka qeyb galeen Wasiirka dhallinyarada iyo Isboortiga Mudane Maxamed Cabdullahi Xasan (Nuux), Wasiirka Haweenka iyo Xuquuqul insaanka Marwo Sahro Maxamed Cali Samatar, Wasiir ku-xigeenka Wasaaradda Warfaafinta, dhaqanka iyo Dalxiiska Mudane Cabdullaahi Colaad Rooble iyo dadweyne aad u fara badan.
Kulanka oo ahaa kii ugu dambeeyay oo lagu soo gabo gabeynayay bandhigga soo nooleynta dhaqanka iyo farshaxanka qeybtiisa cayaaraha ayaa waxaa ka qeyb galay afar degmo oo kala ah Shibis, Howlwadaag, Yaaqshiid iyo Hodan, waxaana kulanka kama dambeysta ah galabta isku arkay cayaartooy ka kala socotay degmooyinka Howlwadaag iyo Shibis, iyagoo soo bandhigay cayaar aad u wanaagsan oo ay la dhaceen dadkii uu soo daawasho tegay cayaarta.
Degmada Shibis ayaa ku guuleystay tartankii loo dhigay afarta degmo, kadib markii ay 43 dhibco ah ay uga adkaaday degmada Howlwadaag oo la timid 38 dhibcood.
Guddoomiyaha Xiriirka Soomaaliyeed ee Kubadda Kolleyga Cabdulaahi Maxamed Nuur (Cadaani) oo goobta hadal ka jeediyay ayaa tilmaamay in tartankan uu yahay mid ay soo qaban qaabisay Wasaaradda Warfaafinta, xiriirkuna uu gacan ka geystay xagga farsamada iyo garoonak ayna ku faraxsanyihiin soo nooleynta dhaqanka iyo farshaxanka.
Wasiir ku-xigeenka Wasaaradda Warfaafinta, dhaqanka iyo Dalxiiska Mudane Cabdullaahi Colaad Rooble oo soo xiray Bandhigga soo nooleynta Farshaxanka iyo Dhaqanka, qeybtiisa Cayaaraha ayaa xusay in Wasaaraddu ay dhiiri gelineyso tallaabo kasta oo lagu horumarinayo dhaqanka, isagoo uga mahadceliyay cayaartooydii tartankaasi ka qeyb gashay ee ka kala socday degmooyinka Howlwadaag iyo Shibis.
Gabo gabadii Wasiirka iyo mas’uuliyiintii kale waxa ay koob iyo bilado guddoonsiiyeen gabdha kubadda Kolleyga ee degmada Shibis.
Sawir Qaade:- Cabdullaahi Muxudiin Codka
