Galmudug: Ciidankeenu waxa ay weli sii baacsanayaan firxadka maleeshiyaadka Al-Shabaab

Cadaado, 26 March 2016: Ciidanka geesiyaasha maamulka Galmudug ayaa weli baacsanaya maliishiyaadka Al Shabaab ee dhowaan soo galey degaannada Galmudug.

Hawlgalka ciidammada Galmudug ayaa ku fiday degaannada Galhagoog, Dinooda, Af-Barwaaqo iyo Towfiiq.
Wasiirka Warfaafinta, Hanuuninta Dhaqanka iyo Dalxiiska Maxamuud Aadan Cusmaan Mesagaway ayaa sheegay in ilaa iyo 120 ka tirsan maliishiyada Al Shabaab ay ku go’doonsan yihiin Dinooda iyo Galhagoog, isla markaana qaarkood la rumeysan yahay inay ajaanib yihiin.
Maliishiyada Al Shabaab ayaa hawlgalladii ugu dambeeyay waxaa looga dilay 11 ruux, halka 25 kalena nolosha lagu qabtey, oo lix ka mid ah ay dhaawac yihiin.
Wasiir Mesagaway ayaa ku ammaanay ciidammada Galmudug sida hufan iyo deg-degga leh ee ay uga hortageen inaanu cadowga isku ballaarinin dhulka maamulka Galmudug.
“Awoodda ciidankeena ay leeyihiin iyo taageerada shacabka ayaa suuragelisay inaan cadowga meel kasta ugu galno, waxaana rajeynayaa inaan dhowaan soo afjari doono hawlgalladan, isla markaana aan dhulka oo dhan ka sifeyno cadowga’’, ayuu hadalkiisa ku soo gabagabeeyay