Xildhibaanad Sahra Cumar Maalin ,ayaa kusoo baxday Kursigii ugu dambeeyay ee mudanayaasha Aqalka hoose ee Baarlamanka Soomaaliya u matalaya maamulka Galmudug, markii ay ka guuleysatay Nimco Xasan Cabdulle oo ka tanaasushay tartankii ay kula jirtay.
Maamul Goboleedka Galmudug ayaa soo gabagabeeyay 36-kii xubnood ee ay saami ahaan ugu heleen Baarlamanka Cusub ee Soomaaliya 2016/2020-ka, waxaana Magaalada Cadaado lagu guddoonsiiyay Habeen ka hor xubnihii halkaasi lagu doortay Shahaadooyinka Xildhibaannimo.
15-ka Bishan ayaa la filayaa in la dhaariyo Xildhibaannada Labada Aqal ee Baarlamaanka Cusub ee Soomaaliya, iyagoo yeelanaya fadhigii u horeeyay, waxaa qorshuhu yahay in 22-ka Bishan Disembar la doorto Guddoonka Baarlamaanka, iyadoo 28-ka Bishanna oo la dooranayo Madaxweynaha Dalka ee Afarta Sana ee soo socota.
