Ganacsato Soomaaliyeed oo kaashanaya Wasaaradda Beeraha iyo Waraabka ee Xukumadda Federaalka Soomaaliya ayaa markii Afaraad Moos u dhoofiyay dalka Boqortooyada Sacuudiga, taas oo muujineysa in uu dib u soo laabtay xiriirkii ganacsi oo ay Soomaaliya la laheyd dalalka caalamka.
Mooskaan maanta la dhoofiyay ayaa ahaa konteenar waxaana ka qeyb-qaatay mashruuc Geel waana markii labaad oo ay u dhoofiyaan dalka boqortooyada Sacuudiga.
Ibraahim Dhaqane Cali oo ka socday mashruuca Geel iyo Cabdiwali Cabdullaahi Muumin oo ka socday shirkadda Muumin group ayaa sheegay in suuq uu leeyahay Mooska dalkeena maadaama dhadhan ahaan iyo caafimaad ahaanba uu wanaagsanyahay, hase ahaatee waxa ay dowladda ka codsadeen inay fududeyso sidii suuqyada caalamka loogu iibgeyn lahaa isla markaana uu qeyb ka yahay kobcinta dhaqaalaha dalka.
Nuur Yuusuf Nuur Agaasimaha Guud ee Wasaaradda Beeraha iyo Waraabka ee Xukumadda Federaalka Soomaaliya ayaa uga mahadceliyay ganacsatada Soomaaliyeed ee ku dhiiraday inay ka shaqeeyaan horumarinta iyo dhoofinta Mooska, waxaana sidoo kale uu sheegay inay tani ififaalo u tahay soo celinta kaalinta mooskeena uu ku lahaa suuqayada Caalamka.
Agaasime Nuur Yuusuf Nuur waxaa kale uu intaa ku daray in dhawaan dib loo howl-galin doono wakaaladdii mooska Soomaaliyeed, isla markaana la dhameeyo sharciyadi dib loogu soo celin lahaa, taasina ay fududeyneyso in guud ahaan dib loo soo celiyo kaalintii mooskeena uu ku lahaa suuqayada Caalamka.
Waa markii afaraad oo ay ganacsatada Soomaaliyeed dalka dibaddiisa u dhoofiyaan mooska ka baxa dalkeena tan iyo bur burkii, waxaana ay kala yihiin dalka boqortooyada Sacuudiga oo laba jeer loo dhofiiyay iyo sidoo kale dalalka Turkiga iyo Qatar oo dhammaantoo saxiib dhaw la ah Dowladda iyo shacabka Soomaaliyeed.
