Tababarka garsoorka Soonka 5-aad (Zone V Referees Clinic) oo Magaalada Muqdisho 6 Octoobar uga furmay garsoorayaasha Soomaaliya iyo Masar ayaa la soo Gabagabeeyay , waxaa xafladdii xiritaanka oo ka dhacday Gos kasoo qayb galay ma’suuliyiin ka socotay Gos, qaar kamid ah Madaxda Xiriirada dalka, Masuuliyiinta Xiriirka kubadda kolayga iyo Ciyaartooy hore.
Kusi-maha Xoghayaha X.S.K.K. Cabdi Cabdulle Baasaale ayaa sheegay in mudada shanta maalin uu aqoon kororsiga socday garsoorka la baray sharciyada Cusub iyo sidii loo dhaqan gelin lahaa isla markaana loo qabtay ciyaaro lagu tijaabiyo lagu na qaaday imtixaanno isugu jira, aqoonta sharciyada, Luqadda iyo orodka kuwaa oo dhammaan guulo ku dhamaaday.
Guddoomiyaha XSKK Cabdullaahi Nuur Maxamed Cadaani oo isna xaflada ka hadlay ayaa sheegay in Ujeedkan aqoon kororsiga xiriirka juhdiga ugu bixiyay ay tahay sidi ay Soomaaliya u yeelan lahayd garsoorayaal heer Caalami ah , garsoorayaasha Imtixaanka Zone V Clinic- ku guulaystayna ay u raadin doonaan mid heer Caalami ah.
Guddoomiye Cadaani ayaa intaa ku daray in aqoon korosiga uu xigi doono dhanka macalimiinta , waxuuna mahad celin usoo jeediyay Gos oo door muhiim ah ka qaadatay qabsoomidda aqoon kororsiga.
Axmed Al Falaki oo ahaa macalli ka socda Fiba ayaa yiri ” Aqoon kororsiga waxuu ahaa mid guulaystay, waxaana doonayaa in aan u mahad celiyo intii ka shaqaysay in aan halkan imaado tababarkana aan bixiyo,” waxaan joogay maalmo kooban , basle cajiib ah oo dadka Soomaaliyeed ay si wanaagsan ii soo dhaweeyeen.
AL falaki ayaa garsoorayaasha u sheegay in u taagan yihiin wadadii ay heer caalami ku noqon lahaayeen, laakiin looga baahan yahay dadaal dheeri ah si ay u gaaraan hiigsigooda, waxuuna hadiyad ka socotay xiriirka kubadda Kolayga Masar guddoonsiiyay Guddoomiye Cadaani, isagoo dhankiisa hadiyad ka guddoomay xiriirka kubadda kolayga Soomaaliya.
Sara Gamaal oo ka mid ah garsoorayaasha reer Masar oo aqoon kororsiga ka qayb qaatay ayaa mahad celin usoo jeedisay garsoorayaasha Soomaaliyeed ay tabarka wadaqaateen waxayna halkaas ku guddoonsiisay buuga cusub oo sharciyadda kubadda kolayga ku qornaa.
Sidoo kale iyada iyo garsoorayaasha Reer Masar ayaa hadiyado la wadaagay masuuliyiinta iyo qaar ka mid ah garsoorayaasha Soomaaliyeed.
Ugu Dambeyn waxaa xafladda soo xiray Guddoomiyaha Gos Cabdullaahi Axmed Tarabi waxuu tilmaamay in la kordhiyo aqoonta garsoorka ay muhiim tahay, balse garsoorayaasha laga doonayo in ay la yimaadaan wada shaqayn wanaagsan oo dhexdooda ah iyo in ay xiriir wanaagsan ay la yeeshaan macallimiinta si ay is aaminaad u timaado taasoo lafdhabar u ah howsha garsoorka.
Guddoomiye Tarabi ayaa dhanka kale u mahad celiyay Macallimiintii iyo garsoorayaashii ka qayb qaatay tababarkan ee u dhashay dalka Masar , waxuuna xiriirka kula dardaarmay in uu halkiisa ka sii wado horumarinta kubadda kolayga.
Waa Markii ugu horreysay oo tabarkan lagu qabto dalka Soomaaliya kaddib 1990-kii, waana guul usoo hoyatay Isboortiga Soomaaliya, gaar ahaan kubadda Kolayga oo horumar ku tallaabsatay.
