Axmed Maxamed Cumar “Leeddo” ayaa dhimashadiisii Tobadaad ka hor waxaa uu bartiisa Facebook soo dhigay Sawir uu ku soo dulquray “waa Sawirkii ugu danbeeyey oo aniga oo doob ah idiin soo gudbiyo jimco wanaagsan saxiibadeyda”.
Axmed waxaa uu isku diyaarinayey aqal galka arooskiisa kaas oo uu soo qorsheynayey bilihii ugu danbeeyey, laakiin wuxuu ku dhintay Qaraxii Maleeshiyaadka Al Shabaab ku laayeen dad aan waxba galabsan oo Muqdisho ka dhacay 22-kii Bisha Decenbar.
Allaha u naxariistee Axmed wuxuu qeybta Warfaafinta u qaabilsanaa Ciidanka Booliska Soomaaliyeed oo uu Sanadkii u danbeeyey ka shaqeynayey.
Axmed wuxuu ku dhashay deegaanka Soomaalida Itoobiya gaar ahaan degmada Gaanshaamo Sanadkii 1990-kii, waxa uuna Waxbarashadisii Dugsiga Qur’aanka, Dugsiga Hoose iyo Dhexe ku soo qaatay isla degmadaasi.
Sanadkii 2005-tii ayuu tagay magaaladda Hargeysa halkaas oo uu ku dhameystay Waxbarsahadda Dugsiga Sare iyo Jaamacadda.
“Sanadkii 2017-kii Febraayo ayuu Axmed Maxmed yimid magaalada Muqdisho wuxuuna shaqo ka helay ciidanka Booliska oo uu kala shaqaynayay qaybta xiriirka warbaahinta.” sidaasi waxaa yiri Muqtaar Ibraahim Aadan oo kamid ah Ehelkiisa..
Allah u naxariistee Axmed wuxuu ahaa nin aad u dabeecad wanaagsan oo leh bulsho aad badan balse Qaraxii maleeshiyaadka Al-Shabaab ay 22-kii bishaan December ka gaysteen Muqdisho ayuu ku waayay naftiisii qaaliga ahayd.
Nolosha qoyskiisa ayuu ku lahaa kaalin weyn waxaana uu ahaa kaliya qofka kaliya ee u dhaq dhaqaaqa qoyskiisa, maaddaama walaalkiisa asaga ka waynaa oo horay gacanta ugu haayay nolosha qoyska uu ku geeriyooday magaalada Burco ee gobalka Togdheer.
W/D:-Cali Axmed Sheekh
