Mudanayaasha Golaha Shacabka ee Baarlamaanka Jamhuuriyadda Federaalka Soomaaliya, ayaa maanta kulan ku yeeshay xarunta golaha shacabka,waxaana kulanka shir guddoomineysay guddoomiye kuxieenka koowaad ee golaha shacabka Sacdiya Yaasiin Xaaji Samatar oo uu wehliyo Guddoomiye kuxigeenka labaad ee golaha Mudane Cabdullaahi Cumar Abshirow.
Ugu horeyn habdhowraha golaba shacabka ee baarlamaanka Dalka Xildhibaan Maxamed Cabdullaahi Xasan (Nuux), ayaa dhaariyay wasiiru dowlaha cusub ee wasaaradda howlaha guud iyo guryeynta ee xukuumadda Faderaalka
Soomaaliya Mudane Siciid Maxamed Maxamuud Xayd oo dhowaan xilkaasi loo magacaabay.
guddoomiyaha guddiga xuquuqul insaanka ee Golaha Shacabka Xildhibaan Xaawo Sokor Cali ayaa xildhibaanada u faahfaahisay warbixinta akhrinta sedaxaad ee hindise sharciyeedka Ilaalinta Xuquuqda Naafada Qaranka oo laba akhrin oo hore soo maray.
Intaasi ka dib xildhibaanadda golaha shacabka oo cod u qaaday hindise sharciyeedka Ilaalinta Xuquuqda Naafada Qaranka ayaa waxaa haa ku ogolaatay 135-Xildhibaan hal xildhibaan ayaa diiday afar xildhibaanna waa ay ka aamustay sida ay sheegtay guddoomiye kuxigeenka koowaad ee golaha shacabka Sacdiya Yaasiin Xaaji Samatar oo natiijada codeynta ku dhowaaqday.
Wasiirka wasaaradda arrimaha qoyska iyo horumarinta xuquuqul insaanka ee xukuumadda Federaalka Soomaaliya Mudane Bashiir Maxamed Jaamac iyo guddoomiyaha guddiga xuquuqul insaanka ee Golaha Shacabka Xildhibaan Xaawo Sokor Cali ayaa xildhibaanadda golaha shacabka uga mahadceliyay ansixinta hindise sharciyeedkan.
Ugu dambeyn Xildhibaanadda golaha shacabka ee baarlamaanka jamhuuriyadda federaalka soomaaliya ayaa maanta waxaa loo qeybiyay akhrinta sedaxaad ee hindise sharciyeedkan xeerka shaqada Soomaaliya.
