Kulankan golaha wasiirada ee maanta oo uu shir gudoominayay Ra’isulwasaaraha Soomaaliya mudane Cumar C/rashiid Cali Sharma’arke ayaa looga hadlay arrimo dhowr ah oo ay ugu horeyso dhanka amaanka iyo hour u socod siinta wadanka.
Shirkooda Khamiislaha ah ayay golaha wasiiradu uga hadleen arrimaha amniga, waxbarashada caafimaadka, ayagoo sidoo kale isku raacay in Generaal Maxamed Xasan Xaamud uu noqdo taliyaha ciidanka Booliska Soomaaliyeed sida uu warbaahinta u sheegay afhayeenka xukuumadda Ridwaan Xaaji Cabdiwali.
“Marka golaha wasiirada dood dheer ayey ka yeesheen magacaabista cida buuxin doonta bookaas oo ay golaha wasiirada soo bandhigeen, waxaana runtii cod aqlabiyad leh ay isku raaceen in general Maxamed Xasan Xaamud oo aad wada garaneysaan ahaana wasiirkii hore ee gaashindhiga uu buuxin doono booskaas waxaan rajeyneynaa inuu ilaahey u saqiro howshaas, “
Sidoo kale waxay golaha wasiiradu isku raaceen in taliyaha ciidanka Asluubta loo magacaabo Gen. Bashiir Maxamed Jaamac “Goobe” oo horay u soo noqday taliyaha nabad sugidda qaranka.
“Golaha wasiirada waxaa kaloo ay maanta aad iyo aad uga dooden magacaabista taliyaha ciidanka asluubta soomaaliyeed oo iyana ay wasaarada cadaalada soo jeedisay dood dheer kadib waxaa laisku raacay in loo magacaabo taliyaha ciidanka asluubta soomaaliyeed general bashiir maxamed jaamac oo horay u ahaa taliyihi nabad sugida hadana ah mudane baarlamaan oo aan filaayo inaad wada garaneysaan qibrad dheerna u leh arimaha ciidanka booliska iyo amniga waxaan rajeyneynaa in isna howshaas uu ka soo dhalaali doono.,
Golaha wasiirada waxaa kaloo wasaarada cadaaladu ay hor keentay qaab siyaasadeedka cafiska iyo fursad siinta dadka xagjirka oo runtii aad iyo aad looga dooday ugu dambeyna la ansaxiyay waxaana ahmiyadiisu ay tahay sidii dadka xagjirka loogu qancin lahaa in ay ka tanaasulaan dhibaatooyinka ay ku haayaan dadkeena soomaaliyeed kadiba cafis loo fidyo”
Golaha wuxuu ansixiyay siyaasadda amniga hoteellada iyo goobaha ganacsiga, taas oo la doonayo inay dhaqan geliyaan milkiileyaasha aminga iyo ganagsatada. Golaha wasiiradu waxa kale oo ay ka hadleen xaalada qaxootiga soomliyeed ee dalka yaman iyo sidii loo soo xiijin lahaa gurmadka lagu badbaadinayo muwaadiniinta soomaaliyeed ee dalka yaman ku xayiran.
