Guddiga doorashooyinka Jubbaland ayaa sheegay in maanta la soo afmeeri doono guud ahaan doorashooyinka Aqalka Hoose marka la dhameystiro saddex kursi ee ka dhiman tirada kuraasta Kismaayo yaal.
Doorashada aqalka Hoose ee ka soconaya magaalada Kismaayo, ayaa maanta la filayaa in la soo gabo gabeeyo, iyadoo maanta ay la dooran doono ilaa iyo 3 kursi oo ah kuraasta 43-da kursi oo laga doonayo in dowlad goboleedka Jubaland ay uga soo galaan baarlamaanka Federaalka ah ee Soomaaliya, waxaana maalinta 9aad ee ergooyinka ku dooranayaan baarlamaanka cusub.
Guddiga doorashooyinka heer gobol ee Jubbalanad ayaa sheegay in maanta la soo afmeerayo doorashooyinka xubnaha Aqalka Hoose, waxaana si aad ah loo adkeeyay amniga goobaha doorashooyinka, si looga hortago dhagaraha ay maleegayaan cadowga Ummadda Soomaaliyeed.
Wafdiga uu hogaaminayo Guddiga Amniga Qaranka ee Doorashooyinka iyo Guddiga Hirgelinta Federaalka ee doorashooyinka dadban ayaa shalay gaaray magaalada Kismaayo, kuwaasi oo u kuur galaya sida ay u socdaan doorashooyinka Aqalka Hoose.
