Guddiga doorashada heer dowlad Goboleed ee Hirshabeelle ayaa caawa guddiga doorashooyinka heer Federaal ku wareejiyay galalka Xildhibaannada Labada Aqal ee deegaannada maamulkaas laga soo doortay, kuwaas oo kala ah 8 xubnood oo Aqalka Sare ah iyo 28 Golaha Shacabka ah.
Guddoomiyaha SEIT Hirshabeelle iyo Guddoomiye ku-xigeenka ayaa agabka ku wareejiyay Wakiilka FEIT ee Hirshabeelle Eng Mahad Cabdi Cumar , waxaan goobjoog ka ahaa xubno ka kala socday SEIT, FEIT iyo EDRC.
Qoraal uu soo saaray guddigu ayaa lagu xusay in kuraasta 10 ka ah ee ku harsan Hirshabeelle lagu soo dhameystiri doono mudo kooban, ayna sida ugu dhaqsiyaha badan ugu wareejin doonaan Guddiga marka ay soo dhameystiraan doorashada.
Guddiyada Doorashooyinka Heer Dowlad-goboleed ee kala ah Puntland, Galmudug, Koonfur Galbeed ayaa kal hore ku wareejiyay Guddiga Hirgelinta Doorashooyinka Heer Federaal xogta Xildhibaannada laga soo doortay Deegaanadooda, waxaana xusid mudan in Guddiyada Doorashooyinka Hirshabeelle iyo Jubbaland ay qeyb ka mid ah ku wareejiyeen Guddiga xogta Xildhibaannada labada Aqal.
