Guddiga Gaadiidka,Dekadaha,Garoommada, ee Gollaha Shacabka,ayaa maanta Kormeer kadis ah ku tagay Dekedda magaalada Caasimadda ee Muqdisho. Guddiga ayaa kormeerka ka bilaabay Xafiiska Wasaaradda Dekedaha iyo Gaadiidka Badda ku dhex leeyihiin Dekedda Muqdisho, halkaas oo ay kusoo dhaweeyeen Wasiir-dawlaha iyo Wasiirku-Xigeenka Wasaaradda oo ay weheliyaan Maareeye-Kuxigeennada Dekedda Muqdisho.
kormeerkaan kooban ayaa u jeeddadiisu aheyd kulanka Guddigu ugu yeedhi doonaan mas’uuliyiinta Wasaaradda Dekedaha iyo Gaadiidka Baddda ee Jamhuuriyadda Federaalka Soomaaliya, oo isbuuca soo socda inow dhaco la rajeynaayo. sidoo kale kulanka ayaa daarnaa inay guddigu xog-ogaal u noqdaan shaqada ka socota iyo sida loogu adeego shacabka iyo ganacsatada kala duwan ee dekedda Muqdisho adeegga siiso.
Guddigu wuxuu soo kormeeray dhammaan xafiisyada dawladda iyo kuwa gaarka ah ee adeegga ka bixiya gudaha dekedda, sidoo kale Guddigu wuxuu u kuurgalay sida uu u shaqeeyo Heshiiska Dawladda JFS ay kula jirto shirkada Turkida ah ee ALBAYRAK, heshiiskaas oo wali aan hor-keenin Golaha Shacabka.
Guddigu, wuxuu hoosta ka xarriiqay baahida ballaadhan ee ay qabaan xafiisyada dawladda ee dekedda ku dhexyaalla, dayacnaanta ka muuqata gaadiidka xammuulka ee dekedda ka qaada/keena badeecooyinka kala duwan. Sidoo kale Guddigu waxay indhahooda kusoo arkeen shaqada dayactirka ah ee ka socota gudaha Dekedda oo laga dayactiray sanduuqa maalgelinta Dekedda Muqdisho.
Faahfaahinta xogta oo dhamaystiran Guddigu waxay la wadaagayaan Guddoonka Golaha Shacabka si gole-weynaha loogu gudbiyo baahida loo qabo in la iska waraysto xaaladda Dekedda Muqdisho iyo Guud ahaan dekedaha dalka oo dhan.
