Guddiga Gaadiidka, Garoommada, Dekedaha, Hawlaha Guud iyo Tamarta ee Golaha shacabka Baarlamaanka Federaalka Soomaaliya iyagoo gudanaya waajibaadka dastuuriga ah ee korjoogteynta iyo la-xisaabtanka, ayaa waxay kormeer iyo korjoogteyn ku soo sameeyeen Gegida Caalamiga ah ee diyaaradaha Aadan Cadde.
Kormeerka oo uu horkacayay Guddoomiyaha Guddiga Xildhibaan Cabdullaahi Cabdi Maxamed (Geelqaad), sidoo kale Guddoomiye kuxigeenka iyo Xoghayaha Guddiga ayaa ku bilaabmay jawi degen, waxaana si habsami leh u soo dhaweeyey Wasiir Ku-xigeenka Gaadiidka iyo Duulista Hawada Soomaaliya, Maareeyaha Garoonka Muqdisho iyo Maareeyaha Hay’adda Duulista Rayidka Soomaaliyeed.
Guddiga ayaa soo kormeeray xafiisyada shaqada ee garoonka Aadan Cadde ka socoto sida xafiiska Maareeyaha, Shaqaalaha ka hawl-gala garoonka, sidoo kalena Guddigu wuxuu soo arkay shaqada dayactirka iyo balaarinta isugu jirta ee laga wado gudaha gegida diyaaraduhu soo caga-dhigtaan ama Airport Run-way. Intii kormeerku socday waxay guddigu su’aalo waydiiyeen mas’uuliyiinta ka hawlgala garoonka.
Ujeeddada, kormeerkan ayaa salka ku haysa sidii guddigu wax badan uga ogaan lahaa shaqada ka socota garoonka iyo adeegga loo qabto shacabka maadaama garoonka Aaden Cadde uu yahay muraayadda dalkeenna laga dheehdo, taasina ay waajibinayso in mas’uuliyad dheeraad ah la iska saaro in si hufan oo daahfuran loogu adeego shacabka iyo ajaanibta ka duula garoonka.
Sidoo kale waxa kormeerkani xoogga lagu saaray oo aad looga hadlay sidii wax looga qaban lahaa cabashada ka jirta dhinaca tiketka iyo in guddigu soo arkaan shirkadda dhismaha iyo dayactirka ka wadda gudaha garoonka iyo sidoo kale shirkadda kale ee qiimeynta ku samaynaysa tayada dhabaha diyaaradda loo dhisayo.
Ugu dambeyntii guddigu waxa uu u mahadnaqay mas’uuliyiintii iyo hawl-wadeennadii u fududeeyey kormeerkooda, sidoo kale waxa ay guddigu ballan qaadeen inay sii xoojinayaan wada shaqeynta guddiga iyo hay’adaha dawladda ee ay korjoogteynta ku leeyihiin, waxaana ay soo saari doonaan warbixin faahfaahsan (Report) oo toosin iyo talo-bixin ba isugu jira oo ku saabsan wixii ay soo arkeen.
