Guddiga Gaadiidka, Dekedaha,Garoommada, Hawlaha Guud iyo Tamarta ee Golaha Shacabka baarlamaanka Jamhuuriyadda Federaalka Soomaaliya xafiiskiisa kulan su’aalo weydiin ah kula qaatay Wasiirka Gaadiidka iyo Duulista Hawada Fardowsa Maxamed Cigaal, Wasiirka Dekedaha iyo Gaadiidka Badda Cabdullaahi Axmed Jaamac ilko-jiir iyo sidoo kale guddiga gaadiidleyda Dekedda Muqdisho,waxaana kulanka shir guddoominayay guddoomiyaha Guddiga Gaadiidka, Dekedaha,Garoommada, Hawlaha Guud iyo Tamarta ee Golaha Shacabka Xildhibaan Cabdullaahi Cabdi Maxamed (Geel-qaad)
Ujeedka kulanka oo ahaa su’aalo weydiin iyo la xisaabtan ayaa sidoo kale waxaa looga hadlay sidii loo xallin lahaa cabashada ka taagan gaadiidka ku xanniban Dekedda Magaaladda Muqdisho sababo la xiriira kaydkii sumadda gaadiidka (taarikada) oo dhammaaday.
Guddigu ayaa waxa uu dhagaystay cabashada ganacsatada gaadiidka, taasoo u muuqatay mid u baahan in si wada jir ah wasaaradaha arrintani ay khusayso ay uga wada hawl galaan xalna looga gaaro.
Labada Wasiir ayaa dhankooda ka jawaabay su’aalo ay weydiiyeen xubnaha guddiga waxa ayna ballan qaadeen in ganacsatada loo fududeynayo sidii gaadiidkaas xanniban loo soo deyn lahaa isla markaana xal looga gaari lahaa caqabadaha taagan.
Ugu dambeyn Guddiga Gaadiidka, Dekedaha,Garoommada, Hawlaha Guud iyo Tamarta ee Golaha Shacabka iyo wasaaradaha Gaadiidka iyo Duulista iyo sidoo kale Dekedaha iyo Gaadiidka Badda ayaa isku afgartay in la hirgeliyo qorshe lagaga hortagayo caqabadahan oo kale mustaqbalka,waxaana guddoomiyaha guddiga oo kulanka soo xiray uu uga mahadceliyay wasaaradaha Gaadiidka iyo Duulista iyo sidoo kale Dekedaha iyo Gaadiidka Badda ka jawaabistooda u yeeritaanka guddiga.
