Kulankaan ay guddiga la socodka iyo dib u eegista BFS Iyo guddiga madaxa banaan ee Dastuurka ay la qaateen qeybaha bulshada, ayaa waxa uu ahaa kulan wadatashi AH, waxaana ka soo qaybgalay guddoomiyaha Golaha Aqalka sare ee BFS, Siyaasiyii, Waxgarad, Culumaa’udiin, Ururada bulshada iyo Bahda naafada.
waxaa kulanka furay guddoomiyaha Golaha Aqalka sare BFS Mudane Cabdi Xaashi Cabdulaahi, isagoo sheegay in dadka Soomaaliyeed looga baahan yahay in fikirkooda ku aadan Dastuurka ay ku biiriyaan guddiyadan.
Burhaan Aadan Cumar oo ka mid ah guddiga la socodka iyo dib u eegista BFS iyo Muumino Shiikh Cumar oo iyadana ka mid ah guddiga Madaxa banaan ee Dastuurka, ayaa sharaxaad ka bixiyay howlaha horyaala guddiyadan, waxayna sheegeen in ay diyaariyeen shaqo howleedkooda shacabka Soomaaliyeedna ay xog ka aruurinayaan.
Xoghayaha Golaha Shacabka BFS C/kariin Xaaji Buux, Maxamed Cabdi Yuusuf oo xilal kala duwan ka soo qabtay dowladihii dalka soo maray, ayaa sheegay in loo baahan yahay in Shacabka laga helo fikrado, si dastuurka KMG ah wax looga qabto.
Kulankan, ayaa ahaa kulan maalinle ah oo ay guddiyada la socodka iyo dib u eegista BFS Iyo guddiga madaxa banaan ee Dastuurka ay la yeeshaan qeybaha kala gedisan ee bulshadda, iyaddoo dhowaana ay kulan noocan oo kale ah ay la qaateen Culumaa’udiinka Soomaaliyeed.
