Guddiga Madaxa Banaan ee doorashooyinka Qaranka oo ku sugnaa dhawaanahan Wadanka Tanzania oo maanta dalka dib ugu soo laabtay ayaa faah faahin ka bixiyay socdaalka ay ku joogeen dalkaasi oo ay kaga qeyb galeen sidii ay u qiimeyn lahaayeen hanaanka doorasho ee ka dhacday Tanzania ee ku saabsaneyd doorashooyinka baarlamaanka golaha deegaanka iyo tan Madaxweynaha.
Guddiga ayaa intii ay joogeen wadanka Tanzania waxa ay kulamo la qaateen guddiga doorashooyinka wadankaasi, kuwaasi oo ay ka dhageysteen hanaanka ay u soo qaban qaabiyeen doorashada dalka Tanzania.
Xaliimo Ismaaciil Ibraahim Guddoomiyaha Guddiga doorashooyinka Madaxa Banaan ee Qaranka ayaa oo Warbaahinta Qaranka kula hadashay garoonka Aadan cadde
“Waxaan ka soo laabanay dalka Tanzania, waxa ugu weyn ee aan u aadnay waxa ay tahay inaan ka soo faa’iideysano, runtii waxbadan ayaa inoo suurta gashay oo aan ka baranay, gaar ahaan sida loo diiwaangeliyo dadka codeynaya, habka uu ku shaqeynayo guddiga doorashooyinka, sida loo sheegayo marka la gaaro natiijada iyo kuwa kale oo muhiim ah” ayay tiri Xaliimo yareeey.
Xaliimo yareey ayaa xustay in waxyaabaha ay ka soo barteen dalka Tanzania ay ku dabaqi doonaan howlaha horyaalla marka la gaaro sanadka 2016-ka, waxaana ay tilmaamtay in hanaanka doorasho ee sanadka 2016-ka laga sugayo qaabka loo maareeyn lahaa Xukuumadda Federaalka ah ee Soomaaliya.
