Gudoomiyaha Aqalka sare ee baarlamaanka Soomaaliya Cabdi Xaashi Cabdullaahi ayaa magaalada dhusamareb uga qayb-galay munaasabada furitaanka kal-fadhiga 2-aad baarlamaanka Galmudug waxaana goob joog ka ahaa madaxwaynaha Galmudug Axmed Cabdi Kaariye (Qoor-Qoor),Sanataro, Wasiiro, maamulka caasimada galmudug iyo marti-sharaf kale oo lagu casuumay.
Xildhibaan Axmed Maxamed Faarax (Osaama) oo ka mid ah baarlamaanka Galmudug kana mid ahaa guddiga qabanqaabada munaasabada ayaa ugu horayn hadlay.
Gudoomiyaha baarlamaanka Galmudug Maxamed Nuur Gacal ayaa khubad uu ka jeediyey munaasabada ku soo bandhiga qorshayaasha horyaala baarlamaanka 2-aad ee Galmudug.
Babdi Xaashi Cabdullaahi ayaa khudbad dheer ka jeediyey waxa uu xusay inuu ku faraxsanyahay ka soo qayb-galka furitaanka kal-fadhiga 2-aad ee baarlamaanka Galmudug waxa uuna sheegay in aqalka sare ee Soomaaliya u soo diri doonaan guddiyo.
Ugu dambayn waxaa munaasabada soo gabagabeeyey madaxwaynaha Galmudug Axmed Cabdi kaariye (Qoor-Qoor) waxa uuna si rasmi ah ugu dhawaaqay furitaanka kal-fadhiga 2-aad ee baarlamaanka Galmudug.
Xildhibaanada Galmudug ayaa waxa ay qaateen fasax dheer ka doorashooyinkii Galmudug ee lagu soo doortay madaxda sare ee maamulka waxaana hada horyaala shaqooyin fara badan.
