Guddoomiyaha Golaha Wakiilada Dowlad Goboleedka Koonfur Galbeed Soomaaliya Dr. Cali Siciid Fiqi oo maalintii labaad howlo shaqo u jooga magaalada Xudur oo maanta booqday isbitaalka guud ee Degmada ayaa gaarsiiyey deeq dawo ah oo tayadeedu aad u sareyso baahi weyna loo qabay, taasoo loogu talagalay in ay ka faa’ideystaan bukaanada isbitaalka lagu daweeyo.
Agaasimaha isbitaalka Degmada Xudur Dr Isaak Maxamed Nuur Boorow iyo Wasiirka Caafimaadka Dowlad Goboleedka Koonfur Galbeed Maxamed Cismaan Haaji Cabdi ayaa guddoomiyaha uga mahadceliyey booqashada iyo deeqda isbitaalka uu soo gaarsiiyey, iyagoo si wada jir ah u shaaciyay in dawada ay ku soo beegantahay xilli baahi weyn loo qabay.
Guddoomiyaha Baarlamaanka dowlad Goboleedka Koonfur Galbeed Dr. Cali Siciid Fiqi ayaa dhakhaatiirta isbitaalka kula dar daarmay in ay xafidaan hantida ummadda, ayna bulshada ugu adeegaan daacadnimo.
Guddoomiyaha iyo wafdigii la socday ayaa booqday bukaanada isbitaalka ku jirey oo ay mid mid u wareysanayeen xaaladahooda caafimaad iyo adeegyada loo qabto.
W/D: Maxamed Xasan Cabdiraxmaan (Xudur)
