Wefdigan uu horkacayayo guddoomiyaha gobolka Bakool mudane Maxamed Cabdi Tall ayaa kormeer ku mareya deegaanada iyo degmooyinka gobolka, ayagoo u kuurgalaya xaaladda nolaleed iyo tan amni ee dadka ku dhaqan goobahaasi,waxaana ku sugan yihiin degmada Rabdhoore ee gobolka Bakool oo kamid ah degmooyinka ay curyaamiyeen maleeshiyaadka Al-shabaab labo sano ka hor laga saaray.
Guddoomiyaha gobolka Bakool Maxamed Cabdi Tall oo ku sugan degmada Rabdhoore oo u waramay warbaahinta qaranka ayaa ka warbixinaya u jeedada kortmeerkooda.
“Waxaan goosanay in aan kormeer ku marno dhammaan degmooyinka gobolka iyo tuulooyinka qaar, waxaan soo marnay tuulada Mooragaabey iyo Garasweyne oo labo maalin aan joognay oo dadweynaha aan la shirnay.” Ayuu yiri guddoomiye Tall.
Mudane Maxamed Cabdi ayaa sheegay in degmada Rabdhoore dadka ku nool ay dhibaato nolaleed oo aad i daran qabaan isla markaana degmado aysan ka jirin inta badan adeegyada bulshada aas aasiga u ah maadaama kooxdii arxan laawiyaasha ee degmada maamuli jirey ay baa’biyeen kaabiyaasha degmada Rabdhoore.
Guddoomoyaha gobolka Bakool Maxamed Cabdi Tall, ayaa sidoo kale sheegay in amaamnka gobolka uu yahay mid la isku haleyn karo isla markaana dhamaan degmooyinka iyo tuulooyinka gobolka laga xoreeyay kooxda nabad diidka ah ee Al-shabaab,waxaana uu hey’adaha samafalka ka codsaday in gargaar la soo gaaraan dadka ku dhaqana gobolka gaar ahaan degmad Rabdhoore.
Kormeerka mas’uuliyiinta maamulka gobolka ay ku marayaan ayaa qeyb ka ah qorshaha maamulka gobolka uu baahida dadka deegaanadaasi ku dhaqan uu ku ogaanayo si looga jawaabo baahidaasi ay indhahooda ku ku soo arkeen, iyadoo sida uu guddmiyuhu sheegay socdaalkooda sii socon doono ilaa ay ku soo wareegaan inta badan degmooyinka gobolka.
