Guddoomiyaha Gobolka Banaadir ahna Duqa magaalada Muqdisho Mudane Cumar Maxamuud Maxamed (Cumar Filish) ayaa saakay ka qeyb qqatay u gurmashada dadkii masaakiinta ahaa ee ay argagixisadu ku xasuuqeen Ex-control Afgooye.
Gudoomiyaha Gobolka oo ay wehliyaan ku-xigeennadiisa iyo laamaha ammaanka oo gaaray goobta uu qaraxu ka dhacay ayaa Warbaahinta u xaqiijiyay in qaraxa uu ahaa gaari kuwa xamuulka qaada, kaasi oo geystay qasaare isugu jirta dhimasho iyo dhaawac.
Guddoomiyaha Gobolka Banaadir ahna Duqa magaalada Muqdisho Mudane Cumar Maxamuud Maxamed (Cumar Filish) ayaa sheegay in 90 meeyo qof ay ku dhaawacmeen, tira kale oo badana ay ku dhinteen, balse tirada rasmiga ah gadaal dambe laga ogaan doono.
Gudoomiyaha Gobolka ayaa sheegay in Bas ay saarnaayeen Arday dhigata Jaamacadda Banaadir uu soo gaaray qasaaraha ugu badan ee dhimashada.
“Qarax weyn oo gaari xamuul ah ayaa saaka isku qarxiyay isgoyska Ex koontarool Afgooye, dhimashada waa badan tahay, waxa uu khasaaraha ugu badan soo gaaray ardayda u socotay dugsiyada iyo jaamacadaha, tirada ugu badan waxay soo gaartay ardayda jaamacadda banaadir”ayuu yiri Guddoomiye Cumar Filish.
Guddoomiyaha ayaa xusay in tirada rasmiga ah ee dhimashada iyo dhaawaca ay la wadaagi doonaan saxaafadda marka uu soo dhamaado tirikoobka hadda socda ee lagu kala ogaanayo dadka wax ku noqday qaraxa
