Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Cabdulqaadir Maxamed Nuur (Jaamac) ayaa xafiiskiisa kulan dhiiragelin iyo bogaadin ah kula qaatay ardaydii kaalmaha ugu horreeya ka galay imtixaankii shahaadiga ahaa ee dugsiyada sare ee dalka, waxaana kulanka ka qeyb galay wasiiru dowlaha Wasaaradda Waxbarashada, Hiddaha iyo Tacliinta Sare ee Xukuumadda Federaalka Soomaaliya iyo tobankii arday ee kaalmaha hore ka galay imtixaanka qaranka.
Guddoomiyaha Golaha Shacabka ee Baarlamaanka Dalka ayaa ugu horreyn ardayda ugu hambalyeeyey natiijada wanaagsan ee ay ka soo hooyeen imtixaankii shahaadiga ahaa ee dugsiyada sare, isagoo ku bogaadiyey dadaalkooda, adkaysigooda iyo juhdiga ay geliyeen waxbarashada, taas oo ugu dambeyn horseedday inay ka mid noqdaan ardayda ugu sarreysa dalka.
Guddoomiye Cabdulqaadir Maxamed Nuur ayaa xusay in guusha ay gaareen ardaydu aysan ahayn oo keliya mid u gaar ah iyaga iyo qoysaskooda, balse ay tahay guul u soo hooyatay bulshada iyo qaranka Soomaaliyeed, maadaama ay yihiin jiilkii mustaqbalka hoggaamin lahaa dalka.
Guddoomiyaha ayaa ardayda kula dardaarmay inay sii laba-jibbaarraan dadaalkooda waxbarasho, kana faa’iideystaan fursadaha ay u helayaan waxbarashada sare iyo aqoonta, isagoo ku boorriyey inay aqoontooda ugu adeegaan horumarka, nabadda iyo dib-u-dhiska dalkooda.
Ugu dambeyn, Guddoomiyaha Golaha Shacabka ayaa uga mahadceliyey waalidiinta, macallimiinta iyo dhammaan bahda waxbarashada Soomaaliyeed kaalintii ay ka qaateen guusha ardaydan, isagoo tilmaamay in maalgelinta waxbarashada iyo dhiiragelinta jiilka cusub ay muhiim u tahay dhismaha Soomaaliya leh aqoon, karti iyo mustaqbal wanaagsan, wuxuuna ardayda ku dhiirageliyey inay noqdaan kuwo ku dayasho mudan, kuna suntan aqoon, akhlaaq, karti iyo waddaniyad, isagoo u rajeeyey mustaqbal ifaya iyo guulo waaweyn oo ay u soo hoyaan naftooda, qoysaskooda iyo qarankooda.
