Guddoomiyaha Golaha Shacabka ee BJFS, Mudane Cabdulqaadir Maxamed Nuur, Wasiirka Warfaafinta, Dhaqanka iyo Dalxiiska XFS, Mudane Cabdifataax Qaasim Maxamuud iyo masuuliyiin kale, ayaa maanta magaalada Muqdisho uga qeyb galay kulan ku saabsan “Waaga Cusub oo Xiriirka Türkiye iyo Soomaaliya: Kalsooni iyo Iskaashi Istiraatiiji ah” kaas oo ay soo qabanqaabisay Agaasinka Warfaafinta Madaxtooyada Jamhuuriyadda Türkiye.
Kulanka waxaa si rasmi ah u furay Guddoomiyaha Golaha Shacabka Baarlamaanka Federaalka Soomaaliya, Mudane Cabdulqaadir Maxamed Nuur, waxaana ka qeyb galay wasiirro, masuuliyiin, diblomaasiyiin, aqoonyahanno iyo khubaro ka kala socday Soomaaliya iyo Türkiye.
Wasiir Cabdulfataax Qaasim ayaa intii kulanku socday ka qeyb dood-wadaag heer sare ah oo looga hadlay xiriirka istiraatiijiga ah ee Soomaaliya iyo Türkiye, iskaashiga labada dal iyo kaalinta muhiimka ah ee Türkiye ay ka qaadatay taageerada Soomaaliya.
Sidoo kale, Wasiir Qaasim ayaa dul istaagay khatarta xadgudubyada ka dhanka ah madax-bannaanida, midnimada iyo wadajirka dhuleed ee Soomaaliya, iyo muhiimadda taageerada Türkiye ee ilaalinta qaranimada Soomaaliya.
Wasiirka ayaa doodda ku soo bandhigay khatarta ay marin-habaabinta, wararka been-abuurka ah iyo ololayaasha lagu khaldayo aragtida dadweynaha ku yeelan karaan xiriirka labada dal, isagoo adkeeyay muhiimadda Istiraatiijiyadda Xiriirka Warbaahinta iyo iskaashiga hay’adaha warfaafinta ee Soomaaliya iyo Türkiye, si loo xoojiyo xogta saxda ah, kalsoonida bulshada iyo xiriirka istiraatiijiga ah ee labada dal.
