Guddoomiyaha Golaha Shacabka Jamhuuriyadda Federaalka Soomaaliya Mudane Maxammad Sheekh Cusmaan “Jawaari” ayaa u hambalyeeyey Guddoonka cusub ee Aqalka Sare ee maanta lagu doortay magaalada Muqdisho.
“hor iyo horaan aniga oo ku hadlaya magaceyga,magaca Guddoonka iyo magaca Xildhibaannada Golaha Shacabka waxaan halkaan hambalyo uga dirayaa Guddoonka cusub ee Aqalka Sare ee maanta lagu doortay magaalada Muqdisho, waxaan Alle subxaanahu wa tacaalaa uga baryayaa in uu la garab galo xilka culus ee loo doortay , si gaar ah waxaan leeyahay Hambalyo maadaama aad noqoteen Guddoonkii ugu horeeyey ee loo doortay Aqal sare oo ay Soomaaliya yeelatay” ayuu hadalkiisa ku bilaabay Guddoomiye Jawaari.
“tallaabada ay jaalleyaasha Aqalka sare ku doorteen Guddoonkooda oo ah Guddoomiyaha iyo labadiisa ku xigeen waa mid ka mid ah calaamadaha kasii marqaati ka caya biseylka siyaasadeed iyo dimuqraadiyadeed ee ay Soomaaliya gaartay waxaana rajeynayaa in aynu si taxadar iyo isku duubni leh u abaarno howlaha na hor yaala ee ay naga sugayaan shacabka Soomaaliyeed”ayuu hadalkiisa sii raaciyey Guddoomiyaha Golaha Shacabka Mudane Maxamed Sheekh Cusmaan “Jawaari”.
Ugu dambeyntii waxa uu Alle ka rajeeyey in uu u fududeeyo howlaha hor yaala Baarlamaanka Federaalka Soomaaliya oo la isku yiraahdo labada Aqal waxaana uu si gaar ah uu rajo uga muujiyey wada shaqeynta uu Guddoonka Golaha Shacabka la yeelan doono Guddoonka Aqalka sare ee maanta la doortay.
—DHAMAAD—
