Kulanka Guud ee Golaha Baarlamaanka Dalka Suudaan oo uu shir Guddoomiyay Guddoomiyaha Baarlamaanka dalka ayuu maanta qudbad ka jeediyay Guddoomiyaha Golaha Shacabka Mudane Maxamed Sheekh Cusmaan Jawaari oo isaga iyo wafdi uu hogaaminayo maalinkii Labaad ay ku suganhihiin magaalada Khartuum ee xarunta dalka Suudaan.
Guddoomiyaha golaha shacabka ee JFS Soomaaliya ayaa qudbadiisa waxa uu ugu horeyn ugu mahadceliyay Xildhibaanada Baarlamaanka dalka Suudaan, guddoonkooda iyo guud ahaan shacabka iyo dowladda Suudaan, waxaana sidoo kale uu ka hadlay xiriirka soo jireenka ah ee ka dhaxeeya dalalka Soomaaliya iyo Suudaan, sidoo kale xoojinta wada shaqeynta ka dhaxeysa labada dal.
Mudane Maxamed Sheekh Cusmaan Jawaari ayaa casuumaad rasmi ah u fidiyay Guddoomiyaha Baarlamaanka Dalkan Suudaan inuu booqasho rasmi ah uu ku yimaado Soomaaliya, sida uu gaba gabada kulanka uu Warbaahinta Qaranka u sheegay Habdhowraha golaha shacabka Xildhibaan Maxamed Cabdullaahi Xasan “Nuux”.
Sidoo kale Guddoomiyaha Golaha Shacabka iyo wafdigiisa ayaa booqday Warshadda diyaaradaha sameysa ee ku taala magaalada Khartuum iyagoo halkaasi kula kulmay Madaxda xaruntaasi oo sidoo kale ay tababar ku qaataan ardayda Kuliyadda Injineerinimada barta ee Dalka wax ku barata.
Ugu dambeyn Guddoomiyaha Golaha shacabka waxa uu xarunta Wasaaradda arrimaha dibadda ee dalka Suudaan kula kulmay Wasiir ku-xigeenka Arrimaha dibadda Suudaan oo ay ka wada hadleen xoojinta xiriir labada dal.
